Сапраўднае свята падарылі сваім бацькам, бабулям, дзядулям, сябрам і настаўнікам выхаванцы Вішоўскага і Галоўчынскага філіялаў дзіцячай школы мастацтваў падчас справаздачнага канцэрта, які адбыўся ў актавай зале Вішоўскай СШ.

Падвядзенне вынікаў – заўсёды адказная задача не толькі для педагогаў, але і вучняў.

Перад канцэртам увазе гледачоў была прадстаўлена выстава творчых работ юных мастакоў і наведвальнікаў класа дэкаратыўна-прыкладнога мастацтва пад кіраўніцтвам настаўніцы Алены МАЛХАСЯН.

Некаторыя са школьнікаў упершыню выступалі на вялікай сцэне, таму вельмі хваляваліся. Але пры падтрымцы сваіх педагогаў Таццяны АШВІЛАВАЙ, Юліі ГАРБУЗАВАЙ, Тамары БІРУКОВАЙ, Анастасіі ІГНАТАВАЙ і Таццяны ДАРОШЧАНКА яны выдатна справіліся са сваімі заданнямі і прадэманстравалі прыгожыя музычныя і харэаграфічныя нумары. Выступленне юных зорачак: піяністаў Ксеніі ШЭРСТНЁВАЙ і Вадзіма КУЖАЛЬКОВА, спявачкі Дар’і ДЗЯНІСАВАЙ, удзельнікаў танцавальных калектываў, а таксама інструментальнага ансамбля вучняў і педагогаў ДШМ суправаджалася самымі шчырымі апладысментамі.

Самыя лепшыя ўзоры сваёй творчасці юныя і таленавітыя выхаванцы музыкальнай школы пакажуць на выніковым раённым канцэрце ў Бялынічах.

                                                                                           Святлана МАГІЛЕЎЧЫК.

                                                                                              Фота аўтара.